ចំនួនមើល: 1853

ភាសាជប៉ុនត្រូវបានគេដឹងថាជាភាសាមួយដែលមានភាពល្បីល្បាញខ្លាំងក្នុងចំណោមភាសាទាំងអស់លើពិភពលោក។ ខាងក្រោមនេះជាចំណុចទាំង៧ ដែលអ្នកគួរសិក្សាភាសាជប៉ុន៖

1. បង្កើនឱកាសការងារ និងអាជីវកម្មទាំងក្នុងស្រុក និងប្រទេសជប៉ុន (បង្កើនប្រាក់ចំណូល)

ចង់ទៅធ្វើការនៅប្រទេសជប៉ុនមែនទេ? វានឹងធ្វើឱ្យអ្វីៗដំណើរការកាន់តែរលូន ប្រសិនបើអ្នករៀនភាសាជប៉ុន។ លើសពីនេះ ចំំពោះការធ្វើអាជីវកម្មវិញ ការ​អាច​ប្រាស្រ័យ​ទាក់ទង​ជាមួយ​អតិថិជន​ឬដៃគូរអាជីវកម្មដោយប្រើប្រាស់​ភាសា​របស់គេ​គឺ​ជា​គន្លឹះ​ដើម្បី​ឈ្នះ​ក្នុងវិស័យអាជីវកម្ម​។ ការចេះភាសាជប៉ុននឹងធ្វើឲ្យអ្នកទទួលបាននូវទិដ្ឋភាពខាងក្នុងនៃវប្បធម៌ជប៉ុន​ ដូចជា​ ការយល់ដឹងអំពីក្រមសីលធម៌ការងារ និងក្រមសីលធម៌អាជីវកម្មរបស់ជនជាតិជប៉ុនជាដើម។

2. ឱកាសអាហារូបករណ៍សិក្សា និងកម្មសិក្សានៅប្រទេសជប៉ុន

ប្រសិនបើអ្នកចាប់អារម្មណ៍ទៅសិក្សានៅបរទេស ប្រទេសជប៉ុនគឺជាជម្រើសមួយដ៏ល្អបំផុត ពីព្រោះសាលាជប៉ុនមានស្តង់ដារខ្ពស់ក្នុងគ្រប់កម្រិតនៃការអប់រំ។ បើសិនជាអ្នកចេះជប៉ុនស្រាប់ នោះវានឹងធ្វើឲ្យការសិក្សារបស់អ្នកនៅប្រទេសជប៉ុននឹងកាន់តែមានភាពប្រសើរឡើង។ ក្នុងនោះផងដែរ ប្រទេសជប៉ុនតែងធ្វើការផ្ដល់អាហារូបករណ៍ដល់សិស្សនិស្សិតបរទេសដែលមានបំណងចង់សិក្សានិងធ្វើកម្មសិក្សានៅប្រទេសជប៉ុន។ ដូច្នេះការចេះភាសាជប៉ុន នឹងមានប្រយោជន៍ខ្លាំង បើសិនជាអ្នកចង់ស្នើសុំអាហារូបករណ៍ទាំងនោះ។

3. ទទួលបាននូវភាពច្នៃប្រឌិត បទពិសោធន៍ និងការស់នៅរបស់ជនជាតិជប៉ុន 

ប្រទេសជប៉ុនជាប្រទេសដីកោះដាច់ស្រយាលដែលមានភូមិសាស្ត្រមិនសម្បូរទៅធនធានធម្មជាតិនោះទេ តែបើយើងមើលពីការអភិវឌ្ឍរបស់ជប៉ុន​គឺស្ថិតក្នុងកម្រិតគួរឲ្យកត់សម្គាល់ខ្លាំង។ ជនជាតិជប៉ុនបានពឹងផ្អែកលើការច្នៃប្រឌិត និងចំណេះដឹងផ្នែកវិទ្យាសាស្ត្ររបស់ពួកគេ ដើម្បីទទួលបានជោគជ័យមិនត្រឹមតែផ្នែកសេដ្ឋកិច្ចប៉ុណ្ណោះទេ ថែមទាំងក្នុងផ្នែកបរិស្ថាន និងវិធីតម្រង់ទិសប្រកបដោយប្រសិទ្ធភាពផងដែរ។ ជនជាតិជប៉ុនត្រូវបានគេស្គាល់ថាជាអ្នកដឹកនាំបច្ចេកវិទ្យាខ្ពស់ក្នុងវិស័យដូចជា ប្រព័ន្ធផ្សព្វផ្សាយអុបទិក ការផលិតគ្រឿងអេឡិចត្រូនិក ឧស្សាហកម្ម និង​មនុស្សយន្តជាដើម។ ដូច្នេះ ការចេះភាសាជប៉ុន នឹងធ្វើឲ្យអ្នកយល់ពីភាពច្នៃប្រឌិត បទពិសោធន៍ និងការអភិវឌ្ឃដ៏លឿនរបស់ប្រទេសជប៉ុនបានកាន់តែច្បាស់។ 

4. ស្គាល់ពីវប្បធម៌ល្បីល្បាញរបស់ជប៉ុន

វប្បធម៌ជប៉ុនបានក្លាយជាផ្នែកមួយនៃវប្បធម៌អន្តរជាតិ។ ក្នុងនេះជប៉ុនមានភាពល្បីល្បាញខ្លាំងដូចជា Anime, Sushi និងManga ជាដើម។ ដូច្នេះ ការរៀនភាសាជប៉ុន នឹងធ្វើឲ្យអ្នកកាន់តែមានភាពងាយស្រួលក្នុងការទទួលយកវប្បធម៌ និងមានទាន់សម័យនៃពិភពលោកទាំងមូល។

5. ផ្សារភ្ជាប់ខ្លួនទៅនឹងជនជាតិជប៉ុនបានលឿន

ភាពច្រើននៃអ្នកប្រើប្រាស់អ៊ីនធឺណិតជាជនជាតិជប៉ុន។ 

ការចេះភាសាជប៉ុននឹងភ្ជាប់អ្នកជាមួយប្រជាជនជប៉ុនបានកាន់តែលឿន ដែលអាចនឹងផ្ដល់អត្ថប្រយោជន័ដូចជាការបង្កើតមិត្តភក្តិ ការសិក្សា ការងារ និងអាជីវកម្មជាដើម។ មួយវិញទៀត បើសិនជាអ្នកចង់ទៅធ្វើដំណើរកំសាន្តឬរស់នៅប្រទេសជប៉ុន វាចាំបាច់ណាស់សម្រាប់អ្នកក្នុងការចេះភាសាជប៉ុន ពីព្រោះភាគច្រើននៃជប៉ុនជាតិជប៉ុនមិននិយាយភាសាអង់គ្លេសនោះទេ។

6. ភាសាជប៉ុនមិនពិបាកដូចអ្នកគិតទេ!

ការរៀនភាសាថ្មីមួយទៀតអាចជារឿងលំបាកសម្រាប់អ្នក ប៉ុន្ដែនៅពេលដែលអ្នកចាំផ្ដើមរៀនភាសាជប៉ុន អ្នកនឹងដឹងថាភាសាជប៉ុនមានភាពងាយស្រួលរៀន និងងាយស្រួលចងចាំខ្លាំងណាស់។ មនុស្សភាគច្រើនចាប់ផ្ដើមរៀនពីអក្សរhiragana មុន។ ដូច្នេះ បើសិនជាជាអ្នកចង់រៀនភាសាជប៉ុន អ្នកអាចចាប់ផ្ដើមរៀនពី hiragana នេះបាន។ 

7. ភាសាជប៉ុនគឺជាជំហានមួយក្នុងការរៀនភាសាអាស៊ីផ្សេងទៀត

មិនត្រឹមតែមានភាពងាយស្រួលក្នុងការរៀននោះទេ ភាសាជប៉ុនក៏មានភាពស្រដៀងគ្នាទៅនឹងភាសាអាស៊ីផ្សេងៗទៀតដែរដូចជា ភាសាចិន និងកូរ៉េជាដើម។ ដូច្នេះបើសិនជាអ្នកមានបំណងរៀនភាសាទាំងនោះ វានឹងធ្វើឲ្យអ្នកកាន់តែមានភាពងាយស្រួលក្នុងការចាប់យកបានលឿន។ មួយវិញទៀត បើមិនជាអ្នកចេះភាសាចិនឬកូរ៉េស្រាប់ ហើយអ្នកចង់រៀនជប៉ុនបន្ថែមនោះ វាក៏នឹងកាន់តែងាយស្រួលចាប់យកភាសាជប៉ុនបានលឿនដែរ ដោយសារតែភាពស្រដៀងគ្នារបស់វា។